Ламбе, 28. XI ’09.

Зрел концерт на хуманитарецот Ламбе

Срамежливото момче од Љубојно, Ламбе Алабаковски, коe пред пет години публиката го избра за нов музички идол, на својот прв солистички концерт во Универзална сала се претстави како комплетен и зрел музичар – објави Дневник.

Ламбе порасна - беше најчестиот коментар што можеше да се слушне од задоволната публика кога излегуваше од салата по два и полчасовната свирка.

Концертот, кој почна по половина час доцнење, предизвика нервоза кај насобраната публика пред салата. Но, брзо се се заборави кога Ламбе се појави на сцената и ја испеа Лесно не ми е, со која симболично порача дека се наоѓа пред голем тест кај публиката.

Добро се сеќавам на оваа иста сцена, кога пред пет години победив зашто вие ме избравте. Во овие години поминав убави моменти, многу концерти, манифестации, создадовме многу песни. Но, имав и многу тешки моменти кои ги пребродив поради вас. Вечерва не ми е лесно, ама подобро ми е кога ве имам вас - им порача Ламбе на присутните.

Дека публиката е желна за концерт на Ламбе покажа минатогодишниот концерт на неговата колешка Елена Ристеска, кога присутните одлично реагираа на неговиот настап. По блокот брзи песни како Кажано е се,Спаси ме, на сцената се појавија првите гости - Јован Јованов и Тони Зен кои заедно со Ламбе ја испеаја Итно ми требаш ти.



На оваа песна мораше да реагира обезбедувањето, бидејќи повеќе дечиња се качија на сцената за да ги поздрават, па се создаде хаос. Ламбе дури и го повика обезбедувањето подобро да си ја врши работата, но децата и тинејџерите до крајот на концертот никој не можеше да ги спречи да не го бакнуваат Ламбе. А тој одвои време за секое од нив и им порача дека тие се причината поради која тој е најсреќен. Оваа вечер беше резервирана само за забава, бидејќи ретки беа тие кои седеа на своите столчиња. Во публиката најмногубројни беа тинејџерките и малите дечиња кои заедно со Ламбе ја пееја секоја негова песна.

Блокот балади почна со Каде песно моја, а големо изненадување за публиката беше кога на сцената се појави композиторот на оваа нумера - Славе Димитров, кој запеа со Ламбе.

Потоа на сцената се појави дуото Некст тајм, кое со двете песни Кога лажеш каде гледаш и Ме остави сам покажа дека е подготвено за нивниот концерт кој го најавија за крајот на декември.

Најемотивниот момент на целиот концерт беше изведбата на Ех да можам, а интерпретацијата која како да излезе од длабочината на неговото срце, предизвика морници кај публиката.

 Ех, само кога би можел да те вратам, ама знам дека ме гледаш од некаде - изјави Ламбе посветувајќи и ја песната на својата мајка.

Како последни гости на сцената се појавија Елена Ристеска и Врчак. Елена, во секси издание, ја испеа новата песна Доста, а Дарко Димитров со Ламбе ја исполни Врати ми го срцето.

Бендот кој го придружуваше Ламбе направи неговите песни одлично да звучат во живо, а тој ги поздрави како бендот кој го поддржуваше најдобриот - Тоше Проески. Ламбе се покажа како одличен домаќин, пејач кој знае како да комуницира со публиката и да ја направи среќна. Но, пред се' покажа дека е зрел и опуштен пејач кој одлично пее во живо и е подготвен за уште многу предизвици. На концертот што го организира продукција М2, поддршка му дадоа многу познати личности, меѓу кои министрите Гордана Јанкуловска, Миле Јанакиески, Дивна Пешиќ, Васил Зафирчев, музичарите Калиопи, Гоце Арнаудов, Влатко Лозановски.

Парите од влезниците ќе бидат донирани за обнова на манастирот Свети Јован Бигорски.

Преземено од Дневник