Ристе Тевдоски

Со мојата музика сакам да ги направам луѓето барем малку посреќни

Ристе Тевдоски, познат и како Ричи од Браво бенд, за МММ го објаснува разидувањето со другарите од бендот, ги открива своите планови и амбиции, како и тоа каде летово ќе се одмара и во кои води ќе се разладува...

Кои беа причините за твоето напуштање на Браво бенд?

Причината е очигледна - соло кариера. Во бендот ми беше прекрасно, постигнавме голем успех, меѓутоа од друга страна и е многу тешко да работиш во екипа. Доаѓаат моменти кога имаш различни ставови, потреби, различна цел...

Во какви односи остани со луѓето од некогашниот бенд?

Тие беа и остана мои драги луѓе, кои ги почитувам, со кои делевме радосни моменти, ги делевме проблемите, ги делевме и успесите. Тоа е нешто што не се заборава. Тоа е мотив за да останеме пријатели цел живот. Значи се гледаме се дружиме и ќе се дружиме.

Зошто од сите продукции ја одбра токму План Б?

Зашто се млади и успешни, полни со енергија, зашто сме на иста фреквенција и зашто имаат голем успех позади себе.

Какви се плановите, кои се амбициите...?

Најпрвин спотот за првата моја песна Влезена во филм. Потоа во јуни следува песна од Лазар Цветковски па следуваат фестивалите Охрид-фест и Макфест, и здравје во декември албумот на кој ке има песни од Лазар, Милан Миланов, Владимир Дојчиновски и Мартин Србиновски.

Некој е во музика заради парите, некој заради девојките...
Кои се мотивите на Ричи?

Музика е се што не опкружува околу нас. Луѓето најмногу перципираат преку звукот зашто тој најдлабоко се врежува во нашата меморија, само некои се свесни, а некои не или талентирани или не. Јас во музиката или музиката во мене е од моите 5 години. Завршив музичка академија во Скопје и во септември планирам да се запишам на постдипломски студии, а мојот мотив е музиката сама по себе... Не само пеењето, туку и компонирањето, музицирањето, свирењето. Музиката е таа што не расположува или растажува. А јас со мојата музика сакам да ги направам луѓето барем малку посреќни.

Може ли во Македонија да се живее од музика?

Во Македонија моментално за жал воопшто многу тешко се живее. Музичарите не се почитувани доволно, посебно не оние кои се во вистинска смисла музичари. Се пласира се и сешто, а се плаќа само добар маркетинг. Иако сотојбата не многу сјајна сепак може да се живее од музика, за жал од тезги претежно, но јас сум оптимист па време е да се променат некои работи.

Со кого од План Б најмногу се дружиш, а кои ти се најдобри пријатели од естрадава воопшто?

Се дружам со сите од План Б. Иста екипа сме треба да се подржуваме. А пријатели од естрадава ми се: Мартин Србиновски, Александар Белов, Браво бенд, Наде Талевска, и маестро Симон Трпчески.

Наскоро започнува сезона на летните одмори. Избра ли дестинација на која ќе одиш?

Во јули и август ќе настапувам во Охрид и Струга и таму ќе бидам се до Охрид-фест, па потоа ќе одам во Словенија и Италија.

Кој е твојот најдобар начин да го утепаш денот?

Не можам да го замислам денот без најблиските луѓе, и без музика нормално... Потоа одам на часови по пеење кај проф. Владо Србиновски, па останувам до касно со учење на некои нови музички програми за компонирање, вежбам кларинет и се спремам за запишување на постдипломските студии и нормално најмногу работам на песните за мојот прв албум.

Што во последно време се врти во твојот цеде-плеер? Која песна и кој албум ти го одбележуваат овој период?

Најновиот албум од Роби Вилијамс, Џибони, Мајкл Бобле, а моментално најомилена песна ми е од Нирвана - Smells Like Teen Spirit.