Владимир Дојчиновски

На Ѓоко му посакувам среќа во Осло, па и да победи!

Со Владимир Дојчиновски, познат македонски композитор, аранжер и продуцент, автор (заедно со Ристо Самарџиев) на песната Среќа, која ја отпеа харизматичниот Влатко Илиевски, која немаше среќа да не претставува на Евросонг во Осло, разговаравме за актуелниот Избор за Евровизија, аномалиите на системот, победничката песна со Ѓоко Танески, прогнозите за во Норвешка, актуелните планови и успеси во кариерата.

Дојчин ретко зборува за медиумите, a уште поретко дава интервјуа, но кога прифаќа разговор, тогаш одговорите се директни, без ракавици, од прва рака...

По дваесеттина дена од националниот Избор за Евросонг, со какви очи гледаш на оваа манифестација?

На нашиот Избор за песна на Евровизија отсекогаш сум гледал како на манифестација која треба да е врв во презентирање на македонската поп или етно музика во Европа, и како на манифестација која треба да го отслика и постоењето на Скопскиот фестивал, во една поинаква форма од минатото, но конкретно за последниот избор имам навистина и да пофалам многу работи, но имам и големи забелешки за одредени нешта.

Како на пример, изборот на композициите - сметам дека треба да биде од затворен тип и со шифри, а не ваков конкурс со име и презиме. За изборот на некои членови од жири-комисијата, кои што и сами да ги прашате не знаат што бараат таму, да не правам муабет.

Едноставно се остава впечаток дека одредени луѓе во МРТВ ми го вреѓаат коефициентот на интелегенција со изборот на такви членови во жири-комисиите, а и не само на мене, туку на сите автори во Македонија.

Со оглед дека песната Среќа, која заедно ја компонираше со Ристо Самарџиев не успеа да стане македонски евровизиски претставник заради правилата на организаторот, се сметаш себе си за губитник или за морален победник?

Тука нема губитници и победници. Мислам дека со вакви правила, со вакви жирирања и со ваков избор на композиции, најголем губитник е Македонија. Едноставно крајно време е да сватат некои луѓе од таа телевизија дека истата не е на мајка им и на татко им, туку дека е наша, на граѓаните на оваа држава, а не нивна приватна.

Значи, не може кој и да го правел тоа жири, да стави во него член кој што потекнува од нивната куќа, и кој што од 365 дена во годината, 360 дена работи заедно со авторот на сега веќе победничката песна на Евросонг кај нас, односно со господинот Кристијан Габроски, и токму тој член да ни ја награди нашата песна со нула бодови, и да стави еден пеац на народни песни по потекло од Охрид, и тој на сега веќе победникот, односно неговиот сограѓанин, да му даде 12, а на нас да ни даде 2 бода.

Значи, тука е веќе се очигледно и немам што дуго да додадам, освен дека на луѓето им е јасно што се случи, и за жал тоа се повторува со години наназад, па затоа најголеми виновници за се ги сметам одговорните луѓе кои треба да обезбедат транспарентен избор, а не да си прават свои приватни журки, а во нив ние да сме актери...

Како ти се допаѓа песната на Ѓоко Танески, и има ли вистина во гласините дека Ѓоко додека траеше конкурсот за песни, побара и од тебе композиција, но ти ништо му немаше испратено?

Како и во многу други интервјуа пак ќе кажам - сметам дека ќе не претставува песна која си има свои квалитети, а и Ѓоко Танески за мене е одличен пејач и добар човек, и мислам дека ќе даде се од себе да не претстави најдобро што може.

Вистина е дека Ѓоко порача песна и од мене, но јас веќе одбрав со кој пејач ќе бидам на овој Избор, и сметав дека најдобра варјанта за песната Среќа и за нас како држава да се претставиме со нешто интересно, дури и за Европа, беше пејачот Влатко Илиевски.

Сметам дека таа беше убедливо најевровизиски спакувана песна од сите што беа изведени кај нас, а ќе беше подобра и од многу песни во Осло.

Какви се твоите прогнози за во Осло?

За Осло немам прогнози. Искрено му посакувам успех на нашиот претставник, да не претстави најдобро до сега, па и нека победи. Иако мислам дека за тоа ќе му фалат овие два члена од жирито во Скопје :)

Какви се плановите врзани за песната Среќа и понатамошната соработка со Влатко Илиевски? Како второпласирани летово ве чека настап на Сунчане скале...

Плановите се да се сними на повеќе јазици и да се сними видео-клип за сите верзии. Сите како тим одлучивме дека Среќа би звучела многу интересно на француски, како и на англиски, па би сакале да направиме некој комбинација од овие два јазика, а ќе ја снимиме најверојатно и на српски и хрватски јазик. Се уште не сме одлучиле на кој јазик ќе пееме на Сунчане скале, иако тоа може да биде и на македонски. Инаку, се надеваме на добар пласман и во Херцег Нови...

Што ново се подготвува во работилницата на Владимир Дојчиновски во последно време?

Сега се подготвуваат и други песни за Влатко Илиевски, односно за неговиот албум,а исто се работи и на албумот од Биба Додева. Работиме на други песни за Сунцане скале, како и за Будва-фест, се подготвува нешто и за пејачи од Хрватска и од Србија, заедно со композиторот Григор Копров. И има уште многу многу други најави, но ќе видиме што се ќе сработиме на крај во нашата работилница.

Што сметаш за свој најголем успех досега, и какви се плановите за во иднина?

Имам неколку за кои не можам да определам дали се најголеми, или не, но сепак најзначајни ми се балканската награда за аранжер на годината, која ја добив на манифестацијата Принчеве награде, која се одржува во склоп на фестивалот Сунчане скале, а ја добив за 2007 година, кога во конкуренција ми беа  Жељко Јоксимовиќ од Србија, како и уште двајца автори од Црна Гора и Хрватска. Драго ми е и учеството на Евровизија во Хелсинки со Каролина Гочева, а меѓу најдрагите ми се и две статуетки кои што беа голем импулс за мене, бидејќи тогаш бев на самиот почеток. Тоа се наградите за композитор и аранжер на годината, за 2001 година, на манифестацијата Дванаесет величенствени, која во тој период беше најпрестижна манифестација од тој тип кај нас...

Иван Беќковиќ